Eth nòste projècte ei Aran. Aran ès tu

Principis e valors

Unitat d’Aran (PNA) recuelh eth pensament de corrents progressistes ena luta entara emancipacion sociau en tot respectar es credences personaus e, damb aguesta ideologia, atier era identitat d’Aran entà obtier entà Aran es mès nautes còtes d’autonomia en tot respectar tostemp era opinion dera majoria des aranesi/es.

Damb era vedença de hèr tèsta as rèptes cambiants dera societat actuau e damb era volontat de trobar-i responses, Unitat d’Aran (PNA) recuelh es bases dera democràcia com un sistèma dubèrt as opinions personaus e individuaus des sòns afiliats e afiliades e des sòns simpatizants. Se base en debat democratic entà cercar eth consens.

Unitat d’Aran (PNA) ei un partit sorgit dera volontat unitària e constituenta d’òmes e hemnes qu’an ua ideologia comuna e compartissen:

  • Uns valors fonamentaus comuns: era libertat, era igualtat, era justícia sociau, era sostenibilitat, era solidaritat, era patz, e era defensa deth ben comun.
  • Un projècte politic entà Aran, entà mantier era identitat deth nòste país e es majors quòtes d’autogovèrn e entath reconeishement efectiu, en toti es sons ambits, des drets nacionaus e istorics que li apertien, atau coma tara conservacion e impuls dera lengua pròpria d’Aran e era sua cultura
  • Era defensa dera igualtat d’òmes e hemnes.
  • Eth besonh de respóner as problèmes sociaus que gesquen en quinsevolh moment laguens dera nòsta societat
  • Eth besonh de facilitar era integracion sociau, culturau e lingüistica, entà que toti es que viuen e trabalhen en Aran. Unitat d’Aran (PNA) lutarà e trabalharà entà qu’es institucions faciliten es mieis entà qu’aguest besonh sigue ua realitat.
  • Era idèa d’ordenar eth territòri entà aufrir en Aran ua nauta qualitat sostenible atau coma eth suenh e mantenement deth patrimòni naturau en toti es sòns encastres.
  • Eth desir de daurir Aran tath mon entà auer preséncia en toti es possibles ambits.
  • Un programa politic de reformes e accions que permeten auançar ena realizacion d’aguesti objectius.