Atau madeish, Unitat d’Aran a recomanat ath PSC qu’era cap de Gabinet dera conselheria d’Agricultura e secretària d’Organizacion dera Federacion deth PSC enes Comarques de Lleida, Mònica Lafuente, forme part tanben dera candidatura. Lafuente, militanta d’UA, ei fòrça vincolada damb Aran e eth partit aranés, damb qui manten laci d’amistat, e enten e coneish de prumèra man es aspiracions deth pòble aranés.
Francés Boya a explicat aué que “Unitat d’Aran presente as sòns candidats entà deféner es interèssi dera Val d’Aran e entà qu’aguesti seguisquen auent era possibilitat d’èster representadi en Parlament”. Eth sindic, que barre ua etapa dempús d’auer estat deputat pendent tres legislatures seguides, d’ençà der an 1999, a assegurat que “a compdar d’ara, voi centrar-me en dar projeccion as hites mercades pendent aguesti tres ans coma sindic e dar pas as joeni entà qu’Aran seguisque present enes principaus lòcs de decision”.