Ath delà, Boya a lamentat “era passivitat deth govèrn de Convergéncia en Conselh, que, un còp mès, òpte per campar entà un aute costat en un debat tan important entara economia aranesa, tostemp justificant es mesures adoptades pera Generalitat, siguen justes o non”.
Tath lidèr d’UA, “cau deféner es interèssi d’Aran e, en aguest cas, èster ath costat deth sector toristic, des sues empreses e des sòns trabalhadors, perque son claus entath progrès de toti e perque aguesta mesura demane un dialòg e un consens que non auem trobat enquia ara”
Mocion de refús ara taxa toristica prevista enes pressupòsti dera Generalitat de Catalonha e de supòrt ath sector toristic d’Aran
Era taxa toristica prevista enes pressupòsti dera Generalitat de Catalunya arribe en un moment en qué eth sector toristic patís ua situacion de dificultat e gravar era estada deth torisme perjudique clarament era competitivitat dera economia aranesa
Era situacion de crisi economica afècte tanben ath sector toristic, que, a despièch de mantier un nivèu d’activitat rasoable, afronte grèus problèmes de rendabilitat dauant era inflacion de places qu’actuaument dispòse eth país, per çò que gravar encara mès es prètzi anarà en detriment des petites empreses familhares.
Era pèrta de competitivitat dauant de d’autes destinacions toristiques de montanha, com Aragon o Andòrra, serà un grèuge difícilament superable e clarament injust dauant dera ja manifestacion clara e contundenta deth govèrn espanhòu contra aguesta taxa.
Aguesta taxa s’impòse sense auer eth consens deth sector toristic, ne des destinacions toristiques, per çò que cau demanar un esfòrç de dialòg e transparéncia.
Ei pr’amor d’aguestes rasons qu’eth grop d’UA-PM-PSC en Conselh Generau d’Aran (e es Ajuntaments d’Aran) propòse ath Plen era adopcion des acòrds que seguissen:
- Manifestar era clara e contundenta oposicion deth Conselh Generau d’Aran (e es Ajuntaments d’Aran) ad aguesta taxa, atau com eth supòrt ath sector toristic dauant d’ua imposicion que grave era competitivitat d’aguest sector d’ua forma injusta e met en risc eth futur de petites e miejanes empreses familiares aué dejà ath limit dera sua rendabilitat.
- Hèr arribar aguesta mocion ath president dera Generalitat e ara presidenta deth Parlament de Catalunya atau com as grops politics deth Parlament de Catalunya.
17 de gèr de 2011