Miguel ei un joen aranés de 26 ans, graduat en Economiques e damb un màster en Direccion Financèra. Actuauments trabalhe en una enterpresa IBEX deth sector financer. Aimant dera Val d’Aran e deth sòn poble, Bossost. Cerque era forma de combinar tostemp eth son trabalh en Barcelona damb ester ena Val.
Maugrat dera tua joenessa, ja portes un temps ena politica activa. Qué te hec a creir en projècte d’UA ?
Ei vertat, era mia prumèra campanha electorau siguec en 2015, la rebrembi força. Era illusion e bona energia que trapè me sorprenec molt positivaments. Era clau d’Unitat d’ Aran son es sons militants e afiliats, ath cap e ara fin te trapes força comode sajant de bastir un milhor país damb gent que pòs considerar familha o amics.
Mès era mia coneishença de UA ven de luenh, en casa nosta era politica aranesa tostemp era tèma de discusion o conversa, dera man deth men pair-sénher Miguel Almansa Calzado, rapidaments me n’encuedè dera importancia qu’a préner part activa dera politica deth territori. “Yayo” a estat un referent, er exemple d’un aranés que de forma umila e desinteressada a trebalhat de valent en tot deféner es interéssi d’Aran, en ua epoca força complicada.
Enquiath moment non as ocupat cap cargue public, mès, as agut bèra experiéncia propeèa damb era gestion publica?
Oc ei vertat qu’enquia dia d’aué non è agut cap cargue public, oc qu’è format part enes listes municipaus mès d’ua forma mès segondária. Totun, è auut era sort de participar en diuèrsi projèctes que m’an permetut compréner coma foncione era administracion publica.
Per exemple, pendent 8 ans è amiat tà deuant era organizacion e gestion de hèstes e actes culturaus en Bossost, a on è pogut trebalhar de forma conjunta damb er equip de govern e es trebalhadors der ajuntament.
Era militáncia d’Unitat d’Aran t’a escuelhut coma representant enes listes deth PSC. Qué t’a impulsat a acceptar aguest répte?
Quan se me proposèc era oportunitat de poder anar en listes deth PSC tath Parlament non ac pensè ne un segon, pramor que creigui qu’ei aprenedissatge personau, mès sustot, qu’ei ua opcion reau e factibla de qu’era Val d’Aran pogue auer representacion en Parlament. E aço sonque ei factible en ua candidatura, era deth PSC.
Voi tanben arregraïr a UA era confiança entà representar ath coma numèro 5 enes listes deth PSC per Lieida, Pirinèu e Aran. Tà jo ei tot un orgulh.
Es proplèu eleccions en Catalunya mercarán de segur eth futur des aranesi e araneses. Quina ei era prepausa que hè eth PSC entà Aran?
Pensi que i a tres eishi fonamentaus, que son:
- Era consolidacion der autogovern d’Aran: Complir d’un viatge damb era Lei d’ Aran, obtier un sistèma de finançament just e acabar damb eth traspas des competéncies ara maxima institucion aranesa. Dera madeisha forma ei important suenhar era lengua e dotar as institucions de recorsi entà arturar eth descens der emplec sociau der aranés
- Inversions e infrastuctures: Impulsar actuacions damb urgéncia enta millorar era carretèra C28 (saturada en força ocasions), bastir un centre culturau referent en Vielha e finalizar es trabalhs de remodelacion der
Espitau Val d’Aran. - Abitatge digne: Cau solucionar era grèu problematica dera viuenda en Aran, e tad aquerò cau qu’era Generalitat s’implique en marc des sues competéncies e tanben que balhe eth suport de besonh ath Conselh Generau d’Aran tà que pogue hèr politiques d’abitatge resolutives.
