Es partits de govèrn en Vielha-Mijaran (CDA e PP) an votat aué en contra dera mocion presentada per Unitat d’Aran en defensa dera immersion en aranés ena escòla. Aguesta mocion siguec aprovada per unanimitat en passat plen deth Conselh Generau, per tant, damb es vòts favorables de CDA. “Damb aguesta accion, CDA e PP se retraten e meten en evidéncia eth sotmetiment des convergents ath PP en detriment des interèssi deth país”, segontes a manifestat eth lidèr dera oposicion, Juan Riu.
Tà Riu, “mentre CDA vòte ua causa en Conselh, vòte ua auta de contrària en Vielha, hèt que demòstre era manca de principis d’un partit que sonque aspire a mantier-se en podèr ath prètz que sigue”. “Tà nosati, era defensa der aranés ei un ahèr de país, que tant defenem enes Ajuntaments coma en Conselh, e non pas ara conveniéncia des nòsti interèssi de partit”, en paraules deth pòrtavotz municipau d’UA.