Eth govèrn deth Conselh Generau d’Aran trabalhe entà cercar solucions ara manca d’abitatge digne e accessible. Per aguest motiu, dempús dera amassada mantenguda entre era Sindica d’Aran e eth Secretari d’Estat d’Abitatge eth passat mes d’octobre, era maxima institucion aranesa envièc un inventari damb ua recopilacion de terrens e espacis municipaus facilitadi pes Ajuntaments deth territòri, coma ei eth cas der Ajuntament de Les, Canejan, Vilamòs, Es Bòrdes e Vielha Mijaran.
Ath delà, era “Comission Bilaterau Generalitat de Catalunya-Conselh Generau d’Aran” dèc lutz verda ara constitucion formau dera “Taula d’Abitatge” entre es dus govèrns, qu’a d’aufrir solucions efectives ara grèu crisi provocada pera manca d’abitatge accessible en Aran, en tot dar resolucion as diuèrses propòstes deth Plan d’Abitatge dera Val d’Aran, desvolopat damb era collaboracion d’ua bona part des Ajuntaments aranesi.
Aguest comission tractarà eth traspàs competenciau en matèria d’urbanisme previst ena Lei d’Aran, que deurie perméter compdar damb es instruments e recorsi de besonh entà revertir era situacion.
Aguestes mesures an de servir entà que tant eth Ministèri coma era Generalitat, competents en aguesta matèria, impulsen abitatge public en territòri.