Eth programa “Campus Rural” impulsat pera Secretaria Generau entath Rèpte Demografic deth MITECO, a estat reconeishut coma era mielhor iniciativa de Desvolopament Locau en Euròpa, guerdon qu’autrège cada an “The Innovation in Politics Institute”, en collaboracion damb “The European Capital of Democracy”.
Eth jurat popular (compausat per 1.086 persones de 25 païsi) a considerat qu’es trabalhs que desvolope “Campus Rural” entà promòir practiques que connècten a estudiants damb comunautats ruraus entà impulsar eth desvolopament rurau e combàter era despoblacion, meriten èster reconeishudi coma “eth mielhor programa europèu en desvolopament locau en Euròpa en 2025”.
Pera sua part, eth Secretari Generau entath Rèpte Demografic, Francés Boya, expresèc er “orgulh que supause veir que se reconeish eth valor de Campus Rurau, un programa que demòstre qu’es nòsti pòbles son territòris d’oportunitats. Contunharam trabalhant entà que, mejançant era innovacion e era creativitat, eth mèdi rurau age un orizon de futur”.
Aguest reconeishement avalore eth propòsit fonamentau deth programa “Campus Rural” ara ora d’apropar as joeni ath territòri e favorir eth papèr dera universitat ena dinamizacion sociau e economica des petiti municipis.
En concrèt, enguan “Campus Rural” a hèt possible que 750 alumnes de 44 universitats publiques agen pogut desvolopar es sues practiques en municipis espanhòls de mens de 5.000 abitants. D’aguesti, e d’ençà de 2023, un totau de 8 estudiants an trabalhat tanben en diuèrses administracions publiques e enterpreses privades dera Val d’Aran.
Eth programa ei impulsat peth MITECO, damb eth supòrt deth Ministèri de Sciéncia, Innovacion e Universitats e dera Conferéncia de Rectors e Rectores des Universitats Espanhòles.