Ua naua edicion de “Vediau” ve era lum entà dar a conéisher a tota era ciutadania d’Aran eth trabalh qu’Unitat d’Aran amie a tèrme autant enes institucions coma ena sua gestion coma partit.
En aguesta ocasion presentam ua naua seccion, “Cornèrs de casa”, ena que volem tanben apropar era cultura, lengua e istòria deth país a totes es persones d’Aran. Ua seccion ena que i poderatz trapar passatemps en aranés, condes bracs, legendes, arrepervèris, curiositats istoriques… entà ajudar a que se coneishen e, per tant, non se desbremben.
Coma sabetz, un des objectius politics d’Unitat d’Aran a estat tostemp era preservacion dera nòsta lengua e cultura pròpries, coma èish vertebrador e coesionador dera societat e coma element que garantize eth nòste autogovèrn. Totun, aguest prètzhèt a estat tostemp restacat a trabalhar entà qu’era cituadania aranesa compde damb toti aqueri servicis de besonh entà desvolopar-se en Aran: era sanitat, era viuenda, eth trabalh, eth desvolopament territoriau e tot aquerò, a trauès dera consolidacion deth nòste autogovèrn.
Cèrtaments, era Val d’Aran de 2024 a pòc a veir damb aquera Val des ans ueitanta, a on tot ère per hèr e a on es prumèrs compassi dera democràcia tot just començauen a auançar. Uns prumèrs passi des qu’enguan ne celebram es 45 ans. Mès, non ei mens vertat tanben que, tot e eth pas deth temps, es òmes e hemnes d’Unitat d’Aran seguim damb eth madeish compromís qu’es que comencèren a bastir eth país qu’aué coneishem. Un compromís qu’ei mès de besonh que jamès entà hèr front as rèptes qu’auem per dauant coma societat, entà poder garantir eth futur de totes persones que viuen en nòste país. E tad aquerò ei indispensable compdar damb complicitats e supòrts dehòra d’Aran, en totes aqueres administracions qu’an tanben era capacitat de decidir sus eth nòste dia a dia e sus eth nòste futur.
Aguesta premisa, que malerosaments d’auti entenen coma inutila e coma ua desleiautat ath país, entà Unitat d’Aran represente totauments çò de contrari e ei clau entà garantir qu’es aranesi e araneses, agen neishut a on agen neishut, poguen desvolopar eth sòn projècte de vida en aguest territòri. Ei per açò que mos sentem fòrça satisfèts e orgulhosi de totes es oportunitats, supòrt e recorsi qu’es nòsti representants enes institucions der Estat e dera deputacion de Lleida an artenhut entà Aran pendent aguest temps e que poderatz tornar a comprobar en aguestes planes.
E atau, demoram tanben qu’eth pròplèu dia 12 de mai poscam díder qu’era Val d’Aran compde damb representacion en Parlament de Catalunya, dera man de Miguel Almansa Filloy, entà seguir trabalhant per ua Val d’Aran mès fòrta, mès coesionada e damb oportunitats entà toti. Aqueth qu’ei e serà tostemp eth nòste prètzhèt.
Maria Vergés Pérez, Secretària Generau d’Unitat d’Aran e Sindica d’Aran