Es darrères noticies publicades enes mieis de comunicacion senhalen era investigacion judiciau ar alcalde de Naut Aran per 5.200€ pagadi en un bar damb era targeta de crèdit municipau.
D’Unitat d’Aran ençà s’exigís ar Ajuntament de Convergéncia transparéncia e claretat sus aguesti pagaments pr’amor qu’aguest tipe de noticies non hèn sonque mauméter encara mès era imatge deth municipi e deth consistòri.
Unitat d’Aran a registrat ua sollicitud formau d’informacion en Ajuntament de Naut Aran damb er objectiu de conéisher, damb tot eth detalh e damb era documentacion justificativa corresponenta, totes es despenes de representacion e es operacions efectuades damb targes bancàries municipaus d’ençà der inici dera actuau legislatura.
Aguesta demana d’informacion se produsís a compdar des informacions apareishudes recentament en mieis de comunicacion relatives a era despena de 5.200€ damb era targeta municipau en un bar per part der alcalde deth municipi, noticia publicada peth diari Segre eth 12 de hereuèr.
Eth pòrtavotz d’Unitat d’Aran, Marc Tarrau, a manifestat que “era imatge deth municipi de Naut Aran se torne a veir tacada per situacions que genèren dobtes e preocupacion ena ciutadania e que maumeten eth prestigi dera institucion e deth municipi. Naut Aran a d’èster referent de bona gestion, de rigor e de transparéncia”.
Tarrau a hijut que “ei imprescindible que s’esclarisque tot damb era maxima celeritat e damb tota era documentacion sus era taula. Quan se tracte de sòs publics, non i pòt auer ombres ne mieges explicacions”.
Unitat d’Aran a sollicitat: era relacion detalhada de totes es despenes de representacion e protocòl imputades ath pressupòst municipau atau coma des despenes efectuades damb targes bancàries municipaus, damb indicacion deth titolar, data, impòrt, concèpte, justificacion institucionau e aplicacion pressupostària; còpia de totes es factures, tiquets e justificants corresponents; e er informe d’Intervencion sus era fiscalizacion d’aguestes despenes.
Atau madeish, deth partit ençà se qüestione eth silenci permanent de Convergéncia Aranesa deuant situacions que afecten dirèctament era credibilitat institucionau der Ajuntament. “En moments coma aguesti cau claretat, responsabilitat e posicionaments inequívocs. Eth silenci non refòrce era confiança dera ciutadania”, a senhalat Tarrau.
Unitat d’Aran reafirme eth sòn compromís damb era transparéncia, era rendicion de compdes e era defensa d’ua gestion publica exemplara.
Val d’Aran, 17 de hereuèr de 2026