Per prumèr còp, un representant d’Unitat d’Aran s’incorporarà coma membre nat ena Comission Executiva Nacionau deth PSC. “Aguesta decision supòse un nau compromís e un estímul potent entàs dus partits, perque permet a UA participar de forma dirècta ena politica catalana e ath PSC dar un pas fòrça important en reconeishement dera diversitat territoriau e era singularitat dera Val d’Aran”, segontes a manifestat aué Francés Boya.
Eth secretari generau d’UA a felicitat ara naua direccion des socialistes catalans e, en especiau, ath nau prumèr secretari escuelhut en 12au Congrès, Pere Navarro. “Damb era nòsta aportacion, volem trabalhar entà bastir era alternativa de progrès qu’an de besonh Aran, eth Pirenèu e eth conjunt de Catalonha dauant era egemonia conservadora, pòc sensibla damb es nòstes tèrres e es dificultats sociaus e economiques des sòns ciutadans”, en paraules de Boya.