Eth partit aranés demanèc setmanes endarrèr era celebracion d’un Plen Extraordinari deth Conselh Generau d’Aran damb motiu des 25 ans dera sua reinstauracion tà debàter sus eth futur d’Aran e reclamar ara Generalitat eth compliment des leis de Regim Especiau e der Occitan, Aranés en Aran
Ager deluns se celebraue eth plen extraordinari deth Conselh Generau d’Aran que, a instàncies d’Unitat d’Aran, aprobaue ua declaracion institucionau damb motiu dera celebracion des 25 ans dera reinstauracion dera maxima institucion aranesa. En aguest document es tres grups politics damb representacion en Conselh Generau, reclamen ara Generalitat eth desplegament inmediat dera Lei de Regim Especiau dera Val d’Aran, aprobada hè mès d’un an dejà atau coma eth desvolopament d’un sistèma de finançament actuaument inexistent.
Francés Boya, Conselhèr pòrtaveu d’UA, manifestaue que “dempús des grèus deficiéncies e besonhs qu’eth Conselh Generau d’Aran a auut en aguesti darrèri ans, lamentam qu’Aran contunhe sense un sistèma de finançament der an 2.011 ençà tà poder desvolopar politiques pròpries”.
Atau madeish, Boya higie que “tanpòc s’a complit encara çò que prevé er article 89 dera naua Lei d’Aran, que mandar-te ara Generalitat a méter en foncionament un hons de dotacion. Dempús d’un an, non s’a hèt cap auanç ena matèria, e era màger part dera Lei ei encara per desvolopar” Tot açò, “demòstre er escàs rigor e interés dera Generalitat en abordar eth desvolopament der autogovèrn aranés”.
Unitat d’Aran tanben a lamentat en aguest Plen qu’es pressupòsti dera Generalitat tà enguan tornen a desbrembar a Aran . “Es inversions previstes en aguesti naui pressupòsti en Aran sonque se destinen a importantes dotacions ath parc d’Esterri e ara glèisa d’Arres (recorsi aguesti darrèrs d’un conveni de 2010)” manifestaue Boya “e desbremben es problèmes relacionadi tamb era manca de places ena residéncia de gent grana, o damb eth sector ramadèr, e non melhoren en arren es dotacions pressupostàries en ensenhament e sanitat”.
Aran, 31 de mai de 2016