Eth nòste projècte ei Aran. Aran ès tu

Unitat d’Aran formarà part dera lista electorau deth PSC tàs pròplèu eleccions autonomiques

Maria Vergés, secretària d’organizacion d’UA e actuaument còsso der Ajuntament de Vielha Mijaran e Conselhèra Generau, ocuparà eth quatau lòc en aguesta lista en representacion deth partit aranés

Unitat d’Aran serà present enes pròplèu eleccions ath Parlament de Catalunya, en tot ocupar eth quatau lòc dera lista deth PSC per Lleida. Maria Vergés, qu’ena actualitat ei era secretària d’organizacion d’aguesta formacion, serà era candidata.
Segontes Vergés: “Aran a besonh de hèr-se a escotar, e en aguestes eleccions, enes que mos i jogam tanben eth futur des aranesi damb ua ipotetica independéncia de Catalunya, resulte indispensable qu’era nòsta veu s’entene”.

Atau madeish tanben a declarat que: “Unitat d’Aran non ei partidària deth trincament, se non deth pacte e der emplec dera politica, en letra màger, entà resòler es diferéncies. Aran, coma Catalunya, vò qu’era sua singularitat sigue reconeishuda e respectada, mès tanben a de besonh politiques que servisquen entà melhorar era qualitat de vida des persones, politiques qu’agen ara gent en centre des sues accions”.
En aguest sentit “credem qu’er unic partit que pòt arténher açò, e tanben que pòt hèr qu’era Constitucion se modifique tà qu’era Val d’Aran i sigue reconeishuda, ei eth Partit Socialista, pr’amor que sabem qu’eth PP non ac harà e que Convergéncia i votèc en contra en Parlament pendent era tramitacion dera naua Lei d’Aran” manifestaue era candidata.