Unitat d’Aran a presentat es sòns candidats de municipis e pedanies damb era volentat d’aportar “naues idèes” entà cadun des vilatges aranesi, atau coma a anonciat eth candidat tà Síndic d’Aran, Paco Boya.
Eth candidat a assegurat qu’Unitat d’Aran ei era “unica fòrça municipalista d’Aran perqué cre ena autonomia des municipis e enes politiques de proximitat”. Boya a proclamat: “Ei era ora des nòsti municipis, deth protagonisme dera gent, des politiques de benèster ath servici de toti, e açò implique seguir er exemple der Ajuntament de Vielha liderat per Joan Riu, entà auer mès abitatge, mès equipaments culturaus e esportius, mès parcatges, mès e melhors infraestructures e carrèrs”. Entad aquerò, “eth Conselh a d’èster ath costat des Ajuntaments, independentment des partits qu’i govèrnen”.
En aguest sens, tant Boya coma Joan Riu an denonciat era deslealtat deth Govèrn d’Aran de cap tar Ajuntament de Vielha. “Era actitud deth Govèrn damb er Ajuntament de Vielha a estat impresentable e ua vergonha”, a afirmat Boya. “Atau non se bastís país”, a concludit.
Eth lidèr d’UA a soslinhat era dificultat qu’a agut CDA entà elaborar es sues listes e a rebrembat qu’eth Síndic a confós partit e institucion perqué era màger part des prumèrs candidats convergents “son a sòu deth Conselh Generau”.
Paco Boya a emplaçat as sòns militants e simpatizants a portar ua campanha serena, damb ganes de guanhar, damb naues idèes e propòstes, pr’amor que tot er esfòrç emplegat amiarà a UA ara victòria tant enes Ajuntaments coma en Conselh Generau.