Es grops d’Unitat d’Aran e PRAG an votat aué en contra dera “politizacion” de Torisme Val d’Aran. Eth govèrn de CDA en Conselh Generau a impulsat un cambi des estatuts qu’excludís ath sector toristic e empresariau dera prenuda de decisions en organisme encargat dera promocion toristica dera Val d’Aran.
A compdar d’ara, i aurà un Conselh Rector, responsable dera direccion toristica, que sonque serà integrat per representants politics: eth sindic, es conselhèrs de govèrn, es alcaldes de Vielha e Naut Aran e un alcalde designat. Eth sector toristic e empresariau quedarà relegat a un Conselh Tecnic, que sonque aurà ua foncion d’assessorament.
Eth conselhèr Juan Antonio Serrano, qu’ei tanben president deth Grèmi d’Ostalaria dera Val d’Aran, a denonciat “era manca d’informacion e era manca de consens politic e empresariau”. “Damb aguesti estatuts, se politize absolutament er organisme de Torisme Val d’Aran”, a assegurat. Eth conselhèr a declarat que “damb es causes de minjar non se jògue”, ja qu’eth torisme ei eth principau sector economic d’Aran, e a afirmat que “ei injust qu’es ajuntaments de Naut Aran e Vielha s’estauvien era sua aportacion de 24.000 èuros, ja que ara aguesti sòs seràn sufragadi peth sector a trauèrs deth crubament dera taxa toristica”.
D’un aute costat, eth Plen a votat era mocion presentada per UA en matèria de politica lingüistica. Es acòrds dera mocion s’an votat separadament, de forma que toti es grops an dat lum vèrda ara comission institucionau encargada de definir e consensuar era politica lingüistica deth Conselh Generau, atau coma ath reconeishement der Institut d’Estudis Aranesi coma autoritat lingüistica der occitan-aranés ena Val d’Aran e ara volentat de collaboracion damb eth Congrès Permanent dera Lengua Occitana.
Totun, CDA a rebotjat reconéisher aguest Congrès integrat per totes es regions occitanes coma eth referent academic respècte dera rèsta der occitan, e sonque UA i a votat a favor. Eth pòrtaveu d’UA, Francés Boya, a demanat ath sindic que convòque un Plen monografic entà estacar eth consens politic ar entorn dera lengua, perque, segontes Boya, aguest ei un “ahèr de país”.
Toti es grops an aprovat era mocion d’UA a favor d’un Parc de Pompièrs en municipi de Naut Aran e era propòsta entà ampliar eth periòde de limitacions ar accès motorizat enes ribères de Valarties e Aiguamòg, qu’a compdar d’ara serà deth dia 15 de junh, en lòc der 1 de junhsèga, enquiath 15 de seteme. UA a mantengut era sua abstencion en cambi dera ordenança d’accès motorizat en miei naturau en relacion ara proïbicion de circulacion de veïculs que supèren era massa maxima autorizada. Fin finau, toti es grops an dat supòrt ara continuïtat des centres especiaus de trabalh dauant era retalhada anonciada peth Govèrn der Estat.