Unitat d’Aran – Partit Nacionalista Aranés se plantege, seriosament, un trencament deth pacte politic que manten d’ençà der an 1991 damb eth Partit des Socialistes de Catalunya (PSC), se aguest partit acabe dant supòrt, enes actuaus tèrmes, ara lei d’organizacion vegueriau que propòse eth Departament de Governacion e Administracions Publiques (ERC). Atau s’a manifestat aué eth president d’UA – PNA, Arturo Calbetó, qu’avalòre plan positivament era relacion qu’UA manten damb eth PSC e que “plan boni resultats electoraus a balhat entà andues formacions en Aran”.
Mès, segontes Calbetó, “UA a uns principis as quaus non pòt renonciar de cap manèra ena sua defensa der autogovèrn aranés, er emparament der aranés e era singularitat politica, culturau e territoriau d’Aran, dehòra dera vegueria deth Pirenèu o de quinsevolh encastre territoriau que non sigue eth madeish, segontes establís era lei de regim especiau de 1990, que reconeish e empare er Estatut d’Autonomia de 2006”.
Arturo Calbetó a dat supòrt as prononciaments qu’eth sindic d’Aran e secretari generau d’UA, Francés Boya, a hèt publics aguesti dies entà excludir Aran dera vegueria deth Pirenèu e reconéisher Aran coma ua Entitat Territoriau Autonòma, perque “eth Conselh Generau ei eth govèrn autonòm e eth resultat en Aran dera descentralizacion administrativa dera Generalitat”.
Eth president d’UA a soslinhat que “non a sentit qu’Aran sigue includit en un encastre administratiu supracomarcau dera Generalitat, perque desnaturalizarie er autogovèrn qu’es aranesi an sabut deféner ath long des sègles”. “Ua lei poderà acabar damb es aliances politiques, mès non pas damb era volentat istorica de tot un pòble”, a sentenciat.