Eth nòste projècte ei Aran. Aran ès tu

UA propòse ua comission aranesa tà consensuar es politiques lingüistiques

Eth grop d’Unitat d’Aran en Conselh Generau d’Aran a presentat ua mocion de supòrt ara creacion d’ua comission institucionau en si deth Conselh entà definir e consensuar es politiques lingüistiques dera maxima institucion aranesa e en supòrt e reconeishement deth Congrès Permanent dera Lengua Occitana e er Institut d’Estudis Aranesi coma autoritat lingüistica der aranés. Atau ac a anonciat aué eth conselhèr pòrtavotz Francés Boya. Era mocion serà votada ena session plenària de deman.

Era comission institucionau serie integrada per representants de totes es fòrces politiques representades eth Plen deth Conselh. Ath delà, se demane reconéisher “eth trabalh amiat a tèrme per Institut d’Estudis Aranesi, e en concrèt era sua Seccion Lingüistica, e lo reafirme coma autoritat lingüistica der occitan, aranés en Aran, ena Val d’Aran”.

UA emplace a “establir ua collaboracion estreta e constanta damb eth Congrès Permanent dera Lengua Occitana entà arténher es consensi de besonh a favor dera normalizacion dera rèsta dera lengua occitana”. D’aguesta forma, UA vò qu’eth govèrn aranés considère aguest Congrès Permanent com “eth referent de caractèr academic respècte der occitan”.

Francés Boya a afirmat que “damb aguesta mocion, volem méter en plaça tres aspèctes fonamentaus entara politica lingüistica: preservar eth consens politic artenhut damb era Lei der occitan, aranés en Aran; avalorar es passi endauant hèti pera rèsta d’Occitània damb eth Congrès Permanent dera Lengua Occitana; e, non mens important, reafirmar era referéncia der Institut d’Estudis Aranesi coma autoritat lingüistica der aranés”.