Eth nòste projècte ei Aran. Aran ès tu

UA presente ua mocion de supòrt as trabalhadors dera residéncia de Les

Eth grop d’Unitat d’Aran-PM-PSC en Conselh Generau d’Aran a registrat aué ua mocion de supòrt ath collectiu de trabalhadors dera residéncia de temps de léser de Les. Eth conselhèr Francés Boya a declarat que “damb aguesta mocion, volem implicar as afectadi e a totes es Administracions entà trobar ua solucion justa que garantisque era continuïtat der equipament a favor dera activitat economica e laborau en Baish Aran”.

Era mocion manifèste era “solidaritat” e eth “supòrt” as trabalhadors afectadi atau com ath petit comèrç e d’auti sectors que tanben pòden patir es conseqüéncies dera decision de barrar eth centre. UA lamente era mesura perque “met en risc es lòcs de trabalh de 50 persones”, e exigís ara Generalitat que la replantege damb er objectiu d’esvitar eth barrament der equipament damb es mesures de besonh entà adaptar-le as paramètres de responsabilitat sociau e sostenibilitat economica.

Francés Boya a auançat qu’UA demanarà crear ua Comission d’Estudi damb era participacion dera Generalitat, es trabalhadors, es Ajuntaments de Les e Bossòst e eth Conselh Generau d’Aran entà avalorar es propòstes de continuïtat der equipament e dera metuda en plaça des possibles mesures de cambi de modèl tà “garantir es lòcs de trabalh e era activitat economica en Baish Aran”.

Atau madeish, UA propòse qu’eth Conselh Generau “non demore ath marge” e se compromete a mediar damb eth Departament d’Empresa e Ocupacion tà atier es demanes expressades e esvitar eth barrament dera residéncia.