Eth nòste projècte ei Aran. Aran ès tu

UA presente ua iniciatiua tà fomentar eth senderisme e incrementar es ajudes ara corsa des 15 pòbles

FRANCESC BOYA ALÓS, portavotz deth Grop d’Unitat d’Aran en Conselh Generau d´Aran e EMILI SANLLEHY MEYA, Portavotz deth PRAG, ara empara de çò que dispause er art. 97.3 en relacion damb er art. 91.4 deth Reiau Decret 2568/86 de 28 de noveme, Reglament d’Organizacion e Foncionament de Regim Juridic des Entitats Locaus, sosmeten ara consideracion deth Plen, entath sòn debat e aprovacion, se s’escatz, era següenta

MOCION

Aran ei un territòri orograficament accidentat, de fòrti pendents e basicament forestau, encara qu´existissen importantes superfícies de peishius naturaus enes montanhes e un notable airau èrm compausat de ròca, tartèrs o gèu. A causa dera nautada e deth pendent, es airaus de montanha com Aran presenten un isolament fisic e ues condicions climatologiques extrèmes que creen dificultats e sobrecòsti permanenti entath sòn desvolopament economic. Totun, era madeisha particularitat des condicions ecologiques dera montanha i determinen era preséncia d´uns recorsi fisics, naturaus o istoricoculturaus singulars e unics, que non sonque representen un valor culturau e un potenciau economic entara populacion locau, senon que son objècte de consum e gaudi entath conjunt deth país.

Aguesta orografia ei diboishada per un hilat de camins que recorren es montanhes, es arribères des arrius, es pòbles, eca. Aguesti camins, protegits pera Lei 3/1995, de 23 de març, de vies pecuàries que les reconeish coma bens de domeni public, an transitat deth sòn usatge ramadèr e forestau, entà un nou usatge toristic, e an vengut vies verdes idonèes entar ecotorisme e eth contacte des ciutadans damb era natura.

Atau donques, eth patrimòni ambientau e païsatgistic d´Aran ei, sens dobte, un des recorsi basics entath sòn desvolopament economic. En aguest sens, es camins mos aufrissen era possibilitat de recuperar era memòria d´un país que, pr´amor des cambis economics e tecnologics ei en transformacion, deishant entà darrèr un mon rurau, plen de tradicions. Es camins, donques, permeten recuperar un atractiu entà explicar e gaudir deth patrimòni naturau e culturau d´Aran.

En aguesti moments, i a en marcha diuèrses iniciatiues de caractèr toristic e culturau, com era “Corsa des 15 pòbles”, qu´a trauèrs d´un recorrut esportiu ara man de toti e que se realize en miei naturau, permet coneisher eth parçan, era sua cultura, era sua istòria e eth sòn païsatge naturau e uman en tot trauessar-lo a pè per camins senhaladi.

Atau donques, s’amie a tèrme era prepausa que seguís:

PREPAUSA D´ACÒRD

1. Impulsar era practica deth senderisme en conjunt d´Aran mejançant un Plan especific qu´ajude ara mielhora dera conservacion e prestacion deth conjunt de camins de montanha d´Aran, vinculant aguesta activitat a recorruts didactics e explicatius dera istòria e era cultura aranesa.

2. Reconèisher era “Corsa des 15 pòbles” com ua corsa d´interès entà Aran que met en valor era activitat deth senderisme. Per aguest motiu cau qu´eth Conselh Generau dongue eth maxim supòrt ad aguesta iniciatiua e ara associacion Hecate, promotora d´aquesta activitat des de hè 11 ans.

Aran, 10 d´abriu de 2006.

Francesc X. Boya Alós Emili Sanllehy Meya
Conselhèr Conselhèr