Er equip de govèrn der Ajuntament de Naut Aran a agut de tornar a sosméter en un plen era aprobacion dera modificacion dera normativa urbanistica entà regularizar era urbanizacion dera Val de Ruda, era licéncia dera quau demorèc anullada en abriu per ua senténcia deth Tribunau Superior de Justícia de Catalunya.
Eth grop d’Unitat d’Aran – PSC s’a abstengut ena votacion pr’amor que denoncie qu’er equip de govèrn a amagat informacion d’interès pendent era tramitacion dera naua propòsta, hèt qu’a significat qu’UA non poguesse avalorar es allegacions presentades ath projècte iniciau.
Ath delà, er Ajuntament a agut de rectificar eth sòn posicionament entà includir en ua madeisha propòsta era preservacion deth telecabina, qu’UA compartís, e era modificacion dera norma qu’afècte ar airau residenciau, pr’amor qu’exigís un aute procediment e ua auta figura juridica. UA s’a mostrat contrari tostemp dera requalificacion der Ajuntament der airau de Ruda, pr’amor que non reflectís damb justícia es interèssi deth municipi.
Eth grop d’UA a criticat era manca de diligéncia der Ajuntament de Naut Aran entà resòlver era incertesa juridica qu’a provocat era sua mala gestion, e l’a instat a reorientar era sua politica urbanistica e eth sòn modèl de gestion municipau damb er objectiu d’atier es besonhs reaus des vesins e es vesies.
Naui vigilants municipaus
Unitat d’Aran a votar a favor dera naua plantilha de vigilants municipaus entà susvelhar peth desplegament dera normativa des escòles d’esquí e dera ordenança municipau sus es establiments nocturns de léser entà garantir eth descans des vesins. Aguesta a estat ua demana prioritària entà UA pendent aguesta legislatura.