Eth Síndic d’Aran, Francés Boya, a assegurat qu’eth rèpte mès important entà Aran ei arténher “un bon finançament que melhore era qualitat de vida des ciutadans deth país”. En ua entrevista tà Catalunya Informació tath conjunt de Catalonha, Boya a destacat qu’er autogovèrn aranés a de besonh “més recorsi e un melhor finançament” en apartats tan importants coma era cultura, pr’amor qu’Aran a de “hèr víuer ua lengua e ua cultura qu’a ua massa critica petita e un referent, er occitan, que non passe per boni moments”.
Eth Síndic a declarat qu’aguesta “serà era legislatura deth cambi en servicis qu’eth Conselh Generau prèste as persones e der auanç der autogovèrn damb era naua Lei d’Aran”. Segontes Francés Boya, era norma a de definir eth marc juridic d’Aran laguens de Catalonha e era tipologia des competéncies. Boya a afirmat qu’èster deputat li autrege era oportunitat, coma Síndic d’Aran e coma unic representant aranés en Parlament, de discutir damb propietat era lei d’Aran “entà que s’ajuste as besonhs reaus deth país”.
Eth Síndic d’Aran a anonciat que s’amassarà damb eth president José Montilla eth dia 2 de junhsèga entà establir ua estratègia comuna e auançar en acòrds de finançament. “Quan m’amassa damb eth president Montilla, demarè qu’era Generalitat s’implique ena normalizacion lingüistica der aranés entà qu’Aran, Catalonha e Occitània agen ua accion unitària ena defensa dera lengua”, a manifestat.
Francés Boya a expressat era sua volentat de mantíer ues “relacions franques e leiaus” damb Catalonha, mès tanben a reclamat qu’Aran “sigue reconeishut coma país laguens de Catalona damb era sua lengua pròpria e eth sòn espaci pròpri”. “Trobaram eth tò e es formules entà qu’aquerò sigue realitat, entà que Catalonha pogue veir en Aran un referent dera defensa des minories politiques”, a exposat.
Atau ac a argumentat: “Es procèssi com eth nòste son complicats, coma n’ei eth de Catalonha damb Espanha, mès nosati, es aranesi, èm gent de dialòg e damb paciéncia; trobaram eth camin e es formules entà, des deth dialòg e era collaboracion institucionau, refortilhar er autogovèrn e era volentat d’èster deth pòble aranés”. Çò d’important entath Síndic Boya ei qu’er autogovèrn “age capacitat entà servir as ciutadans, perqué, en definitiva, er objectiu ei qu’es ciutadans agen melhor qualitat de vida”.