Eth lidèr d’Unitat d’Aran e conselhèr generau, Paco Boya, a estat proclamat candidat per UA entà Síndic d’Aran. Boya a presentat es sòns compromisi entath conjunt deth país en un acte amiat pera conselhèra de Salut dera Generalitat, Marina Geli. “Voi un govèrn que respècte a totes es persones”, a manifestat eth candidat. Boya e Geli an remercat era volentat d’andús d’arribar a ua futura collaboracion institucionau enes pròplèus ans en profit des interèssi der autogovèrn aranés e d’ua politica sociau eficaça e de qualitat.
Paco Boya a anticipat atau eth projècte d’UA en favor dera bona gonvernança d’Aran a mejan e long tèrme sus era basa deth respècte as persones, eth dialòg, era transparéncia e era recerca deth benèster de toti es que viuen e trebalhen en Aran.
Es compromisi deth candidat tà Síndic se fondamenten en tres èishi:
1. Eth compromís pera etica e era participacion.
2. Eth compromís per ua naua Lei d’Aran que melhore eth finançament.
3. Eth compromís per uns servicis publics eficaci e de qualitat.
En apartat institucionau, eth candidat defen era creacion des Conselhs de Terçon coma mecanisme de participacion e concertacion entre era maxima institucion e es ajuntaments pr’amor qu’aué era relacion entre andues administracions ei inexistenta. “Restablint era relacion deth Govèrn d’Aran damb es ajuntaments restabliram tanben eth dialòg damb es ciutadans”, a argumentat. Es Conselhs de Terçon, un per cada demarcacion, amassaràn alcaldes, alcaldes d’EMD, conselhèrs de terçon e Síndic. Boya a explicat qu’aguesta propòsta ei “ua mòstra clara dera anima municipalista e de servici ath ciudatan” deth projècte que represente.
Boya a assomit tanben eth rèpte de cercar er acòrd de totes es fòrces politiques entà limitar eth mandat deth Síndic e crear un còdi etic entà evitar incompatibilitats enes nauti cargues de representacion. Eth candidat s’a autoimposat eth limit de dues legislatures de mandat.
Eth lidèr d’Unitat d’Aran a rebrembat eth besonh d’afrontar ua naua etapa e de dar respòsta as naui rèptes damb era naua Lei d’Aran, qu’a de “definir un nau marc damb mès capacitat d’autogovèrn e melhor finançament”. Segontes Boya, “era Lei permeterà regular es disfoncions qu’aué a eth nòste sistèma”.
Totun, eth projècte qu’a presentat Paco Boya “demorarie tot coish” se non priorizèsse ues politiques publiques en favor deth desvolopament der Estat de benèster entà toti es ciutadans, especiaument d’aqueri que non an arren mès qu’era proteccion dera politica, atau coma a remercat eth candidat. “Volem acabar damb era politica deth chèc qu’a estienut Convergéncia; eth nòste objectiu ei garantir un hilat perdurable en temps d’equipaments e servicis publics de qualitat “, a proclamat Boya.
Paco Boya a afirmat que vò èster ath costat dera societat, atent as sues inquietuds, as sues problematiques, as sòns desirs collectius. Atau coma a assegurat, “ara ei eth còp, eth moment d’un nau govèrn en Aran, eth moment d’arténher mès benestar, de daurir es Institucions ath conjunt des ciutadans. Era ora de bastir país. Era ora deth progrès entà toti e deth respècte entà cada un”.