Eth nòste projècte ei Aran. Aran ès tu

Paco Boya se compromet a fomentar eth trabalh e a garantir era qualitat sanitària

Eth sindic d’Aran e candidat ara reeleccion per Unitat d’Aran, Paco Boya, s’a comprometut a promòir era economia e cercar formules tà generar mès trabalh en Aran se torne a èster sindic. Era atencion as persones e er exercici deth lideratge dera Val en conjunt deth Pirenèu centren tanben es èishi programatics d’UA tath Conselh Generau. Paco Boya a avertit que “encara que acceptam er objectiu d’austeritat ena administracion, volem garantir era qualitat sanitària, pr’amor qu’ei un pilar basic deth benèster dera gent”.

 

Eth prumèr candidat a presentat es sòns compromisi en acte de presentacion dera candidatura d’UA entara maxima institucion aranesa, que s’a celebrat en lòc emblematic dera plaça qu’acuelh era escultura ara lengua e cultura aranesa, prebotjada peth collectiu Lengua Viua en Vielha. Eth prumèr candidat apòste peth madeish equip que l’a acompanhat enes darrèri 4 ans e damb naues incorporacions que garantissen era renovacion deth projècte d’UA.

 

“Es candidats renauim eth nòste compromís per Aran e era sua gent, damb illusion, damb ganes de guanhar eth futur, perque eth nòste ei un projècte transversau, solvent e d’idèes clares damb er unic objectiu de servir as ciutadans e es ciutadanes dera Val”, segontes Boya, qu’a persutat en qué “ara volem hèr mès Aran en tot campar entà dauant”.

 

Eth sindic d’Aran a desgranat es 4 principaus compromisi, que son:

  • a) TRABALH, TRABALH E MÈS TRABALH. Serà era “obsession” d’UA enes pròplèu ans, en tot seguir eth camin encetat pera desestacionalizacion toristica, diversificacion economica e eth foment dera naua economia damb esturments coma eth Centre d’Innovacion Empresariau de Casau.
  • b) PROMÒIR ERA ECONOMIA entà qu’eth modèl de desvolopament aranés sigue viable pendent tot er an.
  • c) MÈS ATENCION AS PERSONES, sustot en encastre dera salut e es servicis sociaus entà qu’arrés demore entà darrèr, sustot es mès fèbles.
  • d) HÈR D’ARAN UA TÈRRA LIDÈR EN PIRENÈU, lidèrn en espòrt damb eth reconeishement oficiau deth Centre de Tecnificacion, lidèr ena educacion, lidèr ena construccion d’ua identitat dubèrta e compartida e un autogovèrn mès propèr e eficaç.