Eth nòste projècte ei Aran. Aran ès tu

Paco Boya: Èm premanidi entà guanhar

-Èm premanidi entà guanhar-. Atau de clar s’a expressat eth candidat tà Síndic d’Aran, Paco Boya, un còp formalizades es candidatures d’Unitat d’Aran entàs eleccions municipaus e tath Conselh Generau deth pròplèu 27 de mai. Eth partit aranesista a presentat es sues candidatures en toti es terçons, municipis e entitats municipaus descentralizades (EMD) d’Aran. Boya a destacat qu’era formalizacion des candidatures en totes es demarcacions demòstre era solidesa e er arraïtzament deth projècte d’Unitat d’Aran e a felicitat a toti es equips peth sòn trebalh e illusion entà arténher un país e uns pòbles damb mès e melhors oportunitats entà toti.

Eth candidat s’a mostrat fòrça satisfèt perqué s’an artenhut dus objectius que s’auie mercat eth partit: elaborar bones listes en toti es pòbles d’Aran e elaborar ues listes representatives dera societat civil aranesa entath Conselh Generau, des quaus formen part -persones damb capacitat contrastada qu’an apostat per participar en govèrn deth cambi-.

-Sò segur qu’eth nòste resultat serà excellent e qu’aguestes seràn es eleccions deth cambi en Conselh Generau perqué cada còp son mès es qui desiren un país mès just, mès democratic e mès plurau-, a declarat Boya.