Eth nòste projècte ei Aran. Aran ès tu

Montilla, eth president qu’a hèt mès en favor d’Aran

Eth sindic d’Aran e secretari generau d’Unitat d’Aran, Francés Boya, a assegurat qu’eth President Montilla “a estat clau entà aprovar era Lei der aranés e reconéisher e arrefortir era singularitat dera Val d’Aran ena Lei de vegueries”. Francés Boya a ahiscat as militants e simpatizants a “anar damb eth cap ben naut” per mor dera bona òbra de govèrn e eth projècte des socialistes a favor dera Val. Eth sindic a hèt aguestes declaracions en acte de presentacion des candidats d’UA entàs eleccions autonomiques, qu’a agut lòc en Vielha damb era participacion d’Agnès Pardell e Mònica Lafuente, numero 2 e 3 dera lista, respectivament.

Era conjuncion entre un President socialista e un Sindic d’UA a estat mès profitosa entà Aran”, en comparacion damb es tempsi en qué eth sindic e eth president compartien adscripcion convergenta, segontes Boya. Eth candidat d’UA, Amador Marqués, a soslinhat que “eth president Montilla ei eth president qu’a hèt mès per Aran en ua legislatura”, e a afirmat que “era candidatura deth PSC per Lleida ei era mès aranesa e era mès sensibla damb es aspiracions deth pòble aranés”. De hèt, ei formada per 4 militants d’UA, en tot començar peth sòn lidèr, Joaquim Llena, e per persones que coneishen plan ben era Val.

Maria Vergés, tanben candidata per UA, a declarat que “se hèm ua comparativa entre es govèrns socialistes e convergents, non i a color, a favor dera opcion que represente eth President Montilla”. En aguest sens, tant Pardell coma Lafuente an persutat ena “claretat deth projècte socialista entà garantir er hilat de proteccion sociau as ciutadans qu’en aguesti tempsi de crisi ac passen mau, dauant era incertesa que represente CiU”. “Nosati non èm ne independentistes ne de dretes”, a precisat Pardell, en referéncia a un des lèmes de campanha deth President Montilla.