Er Ajuntament de Vielha Mijaran a estat constituït aguest dissabte e compdarà damb 7 còssos d’UA, 5 de CDA e 1 de C’s
Juan Antonio Serrano a estat escuelhut coma alcalde de Vielha Mijaran pendent era session d’investidura celebrada aguest dissabte ena sala de plens der Ajuntament. Serrano accedís ath cargue dempús d’auer guanhat per majoria absoluta es passades eleccions municipaus en Vielha Mijaran. Pendent er acte Serrrano a declarat que “serè er alcalde de toti, e voi qu’er Ajuntament sigue dubèrt tostemp entà acuélher as vesins e vesies qu’ac an de besonh”.
“Era nòsta prioritat son e seràn tostemp es persones e eth sòn benèster. Amassa damb eth gran equip uman que m’acompanhe, trabalharam entà qu’aguest municipi artenhe maximes còtes de benèster e desvolopament sociau e economic”, manifestaue en sòn discurs d’investidura.
Atau madeish, Serrano a destacat qu’a era man estenuda ar equip dera oposicion “entà poder a arribar a acòrds qu’ajuden a melhorar era vida dera ciutadania”.
Aguest dissabte se celebrauen tanben es plens de constitucion des ajuntaments de toti es municipis aranesi, entre eri es de Canejan, Bausen, Les e Bossòst, governadi per Unitat d’Aran, damb Carlos Lastera, Veronique Fontan, Emilio Medan e Amador Marqués coma alcaldes respectivament. Tanben èren nomenadi es presidents des EMD araneses, enes que UA governarà en Aubèrt, Unha e Bagergue, que compdaran ath capdauant damb Leopoldo Bonillo, José Paba e Marc Tarrau respectivament.