Damb motiu dera celebracion des pròplèu eleccions municipaus, Juan Antonio Serrano, comence un conjunt d’iniciatives entà remassar era opinion e avaloracion des ciutadans e poder adaptar es sues prepauses de gestion entar ajuntament as besonhs reaus dera ciutadania.
Enes pròplèu dies, eth conjunt des abitants de Vielha Mijaran receberàn enes sues cases un petit e simple qüestionari a trauès deth qué se preten remassar era sua opinion e avaloracion respècte de tota ua sèrie d’ahèrs quotidiani qu’afècten dirèctament ara sua qualitat de vida.
Er objectiu fonamentau d’aguesta enquèsta d’avaloracion ei conéisher era opinion dirècta des ciutadans de cara a incidir, trabalhar e incorporar en sòn programa de gestion entar Ajuntament de Vielha prepauses concrètes e d’acòrd damb es preocupacions e besonhs reaus.
En aguest sens, es vesins e vesines poderàn, s’atau ac desiren, manifestar eth sòn orde de prioritats e avaloracion respècte d’ahèrs basics coma eth mantenement des pòbles, eth besonh de realizar òbres de melhora, joenessa, atencion ath ciutadan, servicis sociaus, promocion culturau, parcatges, neteja des carrèrs, accessibilitat, promocion toristica, espòrts, òci o participacion ciutadana.
Aguesta iniciativa, e d’autes similares, formen part dera naua vision e manèra de hèr politica que Serrano vò implantar en Vielha atau e coma ja auancèc ena presentacion dera sua candidatura.