Eth nòste projècte ei Aran. Aran ès tu

“Haram mès”, eth lèma de campanha d’Unitat d’Aran

“Haram mès” (“Farem més”, “Haremos más”) ei eth lèma de campanha qu’Unitat d’Aran a escuelhut entàs pròplèu eleccions municipaus e ath Conselh Generau d’Aran. Damb aguest slogan, UA vò reflectir es desirs des òmes e hemnes que formen es sues candidatures entà “hèr mès país, mès pòble, entà hèr mès de forma conjunta, entre toti e totes, e dilhèu damb mens recorsi”, segontes eth secretari de Comunicacion, Amador Marqués.

Entà Marqués, “ei important que en aguesti moments de dificultats, es candidats e es projèctes s’impliquen mès damb era gent, trabalhen mès de forma conjunta, en tot collaborar, en tot concertar, perque de forma collectiva s’afronten mielhor es rèptes de futur”. D’aguesta forma, se projècte tath futur eth prètzhèt qu’UA a amiat a tèrme e vò desvolopar enes pròplèu quate ans, tostemp a favor d’Aran e es sòns municipis e pòbles.

Eth lèma s’adaptarà tà cada eleccion (“Haram mès Aran”, “Haram mès Vielha-Mijaran”, eca.) e apareisherà entre cometes e damb era signatura deth cap de lista coma “forma de compromís personau qu’eth prumèr candidat aquerís damb es ciutadans e es ciutadanes”. Eth secretari de Comunicacion a explicat que “se jogarà damb eth color bordèus, fòrça identificat damb Aran e reflèxe deth projècte transversau d’UA, e eth color blanc, coma volentat de transparéncia e austeritat e reflèxe d’ua campanha que serà senzilha, austèra, positiva, emotiva e que parlarà de tu a tu”.

Ath delà, Unitat d’Aran a estreat un nau portau web generic, des d’a on se pòt accedir tanben as webs personaus des prumèrs candidats entath Conselh Generau, Vielha-Mijaran, Naut Aran e Bossòst.

www.unitatdaran.org