Unitat d’Aran a amiat a tèrme pendent es hèstes de Nadau era campanha solidària “Compartís ua rialha entà Nadau” de remassada de joguets. Aguesta campanha, segontes Maria Vergés, secretària d’organizacion d’UA, “a agut coma objectiu balhar supòrt ad aqueres familhes que n’aguesti moments passen dificultats, pr’amor qu’èm conscients qu’ei en Nadau quan es mainatges e mainades que non an jamès un present en aguestes dates son mès conscients dera sua diferéncia”.
Pendent era campanha s’an remassat mès de dus-cents jòcs e joguets qu’an estat repartidi entre un totau de seishanta dus mainatges e mainades. “Des d’Unitat d’Aran èm fòrça satisfèts peth resultat d’aguesta remassada e volem arregraïr era sua collaboracion a totes aqueres persones que mos an hèt a arribar es joguets atau coma tanben a Càritas e ath personau des servicis sociaus e de pediatria, coneishedors dera realitat sociau deth país, qu’an ajudat fòrça en aguesta iniciativa”, segontes Vergés.
Atau madeish, toti aqueri joguets que non s’an podut repartir seran cedidi a Càritas entà que les pogue hèr a arribar as familhes que non participat d’aguesta campanha.