Aguest Congrès Permanent nèish dempús de tres ans de trabalh dera associacion de prefiguracion der organisme de regulacion dera lengua d’òc (APORLOC) que siguec impulsat des deth Conselh Generau d’Aran governat per Unitat d’Aran ena passada legislatura e per Institut d’Estudis Occitans.
Eth Congrès ei un organisme de regulacion der occitan ath servici des usatgèrs dera lengua e a era finalitat de reforçar era unitat der occitan en tot respectar-ne es diuèrses variants, en tot trabalhar ena produccion d’utisi lingüisitics de referéncia coma diccionaris o lexics, ena regulacion lingüística e ena recerca scientifica.
Francés Boya, qu’assistic ar acte amassa damb d’auti representants aranesi, manifestaue que “aguesta ei ua hita istoirica que neishie en Aran ara hè 3 ans e que represente un saut entà deuant tar occitan plan important”.
Atau madeish Boya remercaue que “ara mès que jamès ei de besonh era unitat d’accion entorn era lengua e pr’amor d’aquerò cau que tanben era Generalitat de Catalunya e eth Conselh Generau d’Aran balhen supòrt ad aguest procès”.
Er acte, que se desvolopèc ena sedença deth Conselh Regionau d’Aquitània, acabèc damb era signatura des estatuts deth Congrès per part de toti es sòns membres e convidadi.