Eth senador Francés Boya a iniciat aué era sua intervencion en Plen deth Senat en occitan, aranés en Aran, “per respècte ara diversitat lingüistica e perque ei ua lengua damb pògui parlants”. “Creigui qu’er aranés merite ua oportunitat en aguesta cramba”, a afirmat. Era reivindicacion a meritat es aplaudiments dera part quèrra deth Senat.
D’un aute costat, eth tanben pòrtavotz deth grop dera Entesa enes ahèrs d’Agricultura a presentat ua esmenda a ua mocion deth PP sus era reforma dera Politica Agrària Comuna (PAC) dera Union Europèa. Boya a qualificat era mocion de “pòc precisa, generica, damb un excès de carga electoralista e damb ua enfasi guerrèra contra es socialistes”.
Eth senador a destacat qu’era mocion s’auesse agut de consensuar entre toti, e a anonciat qu’eth grop tendirà era man ath PP, s’era negociacion arribe a bon pòrt. Boya a assegurat qu’eth rèpte dera naua PAC ei eth debat sus es recorsi, ja que “era reduccion serà grèu”.
Tà Boya, “cau qu’era gestion, ara mès complèxa, se hèsque de forma eficaça e senzilha”. Ath delà, a defenut era descentralizacion, e a explicat que Catalonha a possibilitat d’assomir era gestion e eth pagament, d’acòrd damb eth posicionament catalan manifestat peth Parlament.