Eth nòste projècte ei Aran. Aran ès tu

Es impòsti municipaus pugen un 10 % de mieja en Vielha – Mijaran

Eth govèrn de CDA e PP a incrementat era contribucion en un 25 % en dus ans.

Unitat d’Aran a denonciat aué qu’er Ajuntament de Vielha – Mijaran a pujat es impòsti municipaus en un 10 % de mieja entar an 2010, atau coma reflectissen es pressupòsti, e a criticat ar equip de govèrn (CDA e PP) perque a mentit as ciutadans deth municipi en afirmar qu’es impòsti s’an congelat. Entà Unitat d’Aran, aguest extrem non ei pas vertat, coma pòden comprovar es vesins e es vesies en pagament dera contribucion.

En dus ans de govèrn de CDA e PP, s’an incrementat es impòsti municipaus en un 25 % de mieja, mesura qu’UA considère inadequada en contèxte de fòrta crisi, en qué fòrça familhes patissen dificultats economiques. Eth grop d’UA a hiscat ath govèrn a mantier er Impòst de Béns Immòbles (IBI) as nivèus dera legislatura anteriora, abantes dera sua pujada en 2009.

Unitat d’Aran – PSC s’a queishat dera pòga ambicion deth govèrn locau entà fomentar eth trabalh e era economia deth municipi, perque CDA e PP an reaccionat tard e mau entà hèr front ara crisi en Vielha – Mijaran, quan eth grop ena oposicion hè un an qu’avertís deth besonh de préner mesures en aguest sens.