Atau ac an manifestat aguestes E.M.D, en tot seguir era linha der Ajuntament de Canejan, que dejà cedic era sua maquinària e personau entàs trabalhs de neteja amiadi a tèrme en pòble de Les.
Eth president dera EMD d’Unha, José Paba, d’Unitat d’Aran, hège a saber ar Ajuntament de Naut Aran que metie a disposicion der Ajuntament toti es mieis des qué dispause, autant economics coma materiaus, entà ajudar enes reparacions des desperfèctes ocasionadi per aiguat deth passat 18 de junh en Aran. Paba hège aguestes declaracions en darrèr plen qu’aguest ajuntament celebrèc enes passadi dies, “Unha non dispause de granes quantitats economiques, mès ei en moments coma aguesti quan cau hèr tot çò possible entà recuperar es nòsti pòbles”, declaraue Paba.
Pendent es aiguats e es dies posteriors, er Ajuntament de Canejan, governat per UA, cedic ath pòble de Les tota era sua maquinària disponibla atau coma eth sòn personau entà collaborar enes trabalhs d’evacuacion de vesins e de neteja des desperfèctes.
En aguesta madeisha linha de supòrt e acompanhament ara poblacion, e damb er objectiu d’ajudar a revitalizar era economia deth pòble e aleugir es cargues deth sector toristic en aguesti moments, er Ajuntament de Bossòst a suspenut eth crubament dera taxa des terrasses, en coeréncia tanben damb era reclamacion deth sector de supression dera taxa toristica.
“Passades dejà quauques setmanes es pòbles dera Val d’Aran afectadi pes aiguats, recupèren a plaser era sua normalitat, e cau destacar, sustot, eth gran trabalh, esfòrç e esperit de superacion des nòsti vesins e vesies qu’an ajudat de valent entà qu’aguesta normalitat sigue possible”, declaraue recentament Emilio Medan, alcalde de Les.
Fòto: Marta Lluvich/ACN