Eth mes d’agost passat eth sindic d´Aran, Carlos Barrera, auec ua amassada tamb eth president dera Generalitat de Catalonha, Pasqual Maragall, e aprofitèc tà presentar-li eth nomentat document qu´eth president deth Govèrn catalan se comprometec a estudiar.
Aguest document ère encara pendent dera aprobacion des ajuntaments pr´amor qu’eth Conselh auie previst elaborar ua propòsta unica entre toti es partits tà portar-la tath Parlament, e tanben ère pendent des resultats d´ua consulta populara que se hec enviant eth document consensuat a totes es famílies.
Des deth Conselh se convoquèren dues amassades tamb es representants de toti es ajuntaments entà obtier ua propòsta unica sus quina serie era implicacion dera Val d´Aran en nau Estatut d´Autonomia. Se presentèren dues propòstes possibles a debàter e, entà arténher era unanimitat, se formèc ua comission de trebalh assessorada peth Sr. Francesc Caminal entà redactar un nau document.
Coma membre d´aguesta comission de trebalh voi expressar era mia opinion per ua part gratificanta, per participar en un debat que siguec fòrça respectuós, mès confrontat sonque en un punt, deth quau des deth prumèr moment presentè eth mèn desacòrd, e per ua auta part, de desaprobacion deuant d´un hèt deth quau me sentí objècte de manipulacion. Ara seguida dongui era mia explicacion:
Redactat eth document dempús de matisar eth punt discordant, se decidic portar era naua propòsta tàs ajuntaments a on se darie opcion a toti es representants des diferents
Partits politics a expressar era sua opinion e a presentar es sues objeccions o esmendes que podessen dar lòc a bèra modificacion en cas de considerar-se de besonh. Creigui qu´aguest ei un bon exercici democratic se i a eth desir de que se i veigue contemplada era opinion de totes es persones qu´an dat era sua confiança as que les representen.
Des d´un prumèr moment auia clar qu´aguesta ère era intencion per part deth Conselh Generau d´Aran e atau madeish per part dera comission dera quau jo èra membre; de non èster atau non auessa firmat un document barrat sonque ara decision des que ne formàuem part, pr´amor aguesta comission a part de non representar a toti es partits politics, enteni que se formèc tamb caractèr consultiu. Eth motiu dera mia indignacion siguec dempús de saber qu´en bèri ajuntaments s´auie presentat aguesta propòsta unica com un document barrat a quinsevolh objeccion possibla de modificacion e simplament dubèrt ara possibilitat de votar a favor, en contra o abstier-se.
Coma membre dera Comission, demani qu´aguesta se ratifique deuant dera opinion publica sus quina ère era intencion en tot autrejar-se as ajuntaments e que des d´aguesti se daurisque era possibilitat de hèr bèra modificacion se se demane. De non èster atau voi expressar eth mèn desacòrd tamb eth resultat des votacions pr´amor que considèri que non respècte era pròpria volontat expressada per part deth Conselh Generau d´Aran.
Cristina Enseñat
Membre dera Executiva d´Unitat d´Aran