Damb ua superfície de 620 quilomètres carrats e damb eth 30% d’aguesta, peth dessús des 2.000 mètres de nautada, era Val d’Aran ei sense dubte, un territòri de referéncia entara practica esportiva. Aran, provedís era oportunitat d’enténer er espòrt coma un èish transversau e vertebrador dera societat, en tot èster un element clau de coesion sociau, salut comunautària e de desvolopament economic.
Montanha e espòrt, van dera man coma sinonims quan se parle de practica esportiva coma abituda saludabla, es sòns efèctes mos balhen un benèster fisic e emocionau incomparables. Èster en contacte damb era natura, mos genère fòrça mès beneificis des qué mos imaginam.
Enténer era Val d’Aran coma scenari esportiu, ei aufrir totes es possibilitats imaginables entara realizacion dera practica esportiva. Er espòrt, place ath nòste territòri coma un destin toristic esportiu a nivèu nacionau e internacionau. Es espòrts de nhèu e montanha son un actiu fòrça important entà Aran, mès mos cau trabalhar en desvolopament d’iniciatives damb es que pogam artènher ua activitat constant ath long der an, qu’ajuden a méter en valor a tot eth territòri.
Eth govèrn d’Unitat d’Aran en Conselh Generau d’Aran, trabalhe entà desvolopar es competéncies deth departament d’espòrts, un airau que vò consolidar ua estructura solida, que planifique e gestione es politiques esportives damb ua vision clara e, que per prumèr viatge age ua guardada de futur.
En aguest sens, ei eth prumèr viatge ena istòria recenta d’Aran, qu’un govèrn deth Conselh Generau impulse politiques esportives e trabalhe en traspàs dera competéncia d’espòrts qu’a de perméter que s’amien a tèrme politiques des deth territòri entath territòri e gestionar atau, aguest airau. Es rèptes en matèria esportiva son ambiciossi, mès auançam de forma decidida entà hèr efectiu aguest traspàs.
Atau, trabalham entà garantir era practica esportiva ara societat aranesa, damb un nau sistèma eficaç, inclusiu e sostenible, adaptat as besonhs dera nòsta comunautat e as desafiaments deth sègle XXI. Deth govèrn deth Conselh Generau d’Aran estant, balham era man as ajuntaments e municipis entà establir amassa un hilat equilibrat d’installacions esportives e auer entre toti, ua vision conjunta dera Val d’Aran coma país e territòri unic, en tot identificar es besonhs esportius e sajar optimizar es recorsi.
Mos trobam en un moment clau tà definir entà on volem anar en matèria esportiva. Volem desvolopar un Plan Director que mos mèrque eth camin a seguir entàs pròplèu ans, e plaçar ara Val d’Aran coma referent Esportiu. Un lòc a on toti sense excepcion, poguen gaudir der espòrt e deth benèster.
Javier Cavero Sáez.
Vicesindic 3au
Conselhèr d’Espòrts