UA censure es declaracions der alcalde dera Seu d’Urgell entà includir Aran ena vegueria deth Pirenèu
Unitat d’Aran apòste per que sigue era Val d’Aran qui decidisque sus eth sòn pròpri futur territoriau, atau coma a hèt per miei deth Plen deth Conselh Generau, contrari a includir Aran ena vegueria der Alt Pirineu i Aran. En aguest sens, UA censure es declaracions der alcalde dera Seu d’Urgell e deputat de CiU en Parlament, Albert Batalla, qu’a indicat qu’er Ajuntament apòste perque Aran forme part dera vegueria. Entà UA, non ei pas er Ajuntament dera Seu d’Urgell qui a de decidir a on a d’èster era Val d’Aran. Eth posicionament deth consistòri ei era pijor forma de respectar era autonomia aranesa, segontes UA.
En aguest sens, eth partit aranés considère que tant era declaracion institucionau coma es declaracions der alcalde son ua gessuda entà dauant en uns moments plan critics entara lei de vegueries, pera manca de consens e dialòg damb eth conjunt deth territòri. Unitat d’Aran reitère era sua oposicion ara vegueria deth Pirenèu e avertís que, en sègle XXI, es lideratges territoriaus non se pòden arténher per imposicion administrativa, en referéncia as ambicions dera Seu entà èster caplòc d’ua vegueria que, aué per aué, non respècte era autogovèrn dera Val ne respon satisfasentament as besonhs reaus des abitants deth Pirenèu.