Era naua residéncia geriatrica Sant Antòni de Vielha compdarà damb un nau programa (Programa Respir) de supòrt as familhes qu’aufrís estades temporaus en regim sociosanitari, entre d’autes prestacions, atau coma a anonciat era conselhèra de Sanitat e Servicis Sociaus, Noelia Costa, dempús dera sua visita entàs òbres de remodelacion deth centre. Tanben a profitat entà informar qu’eth departament qu’entèste a barrat damb França un acòrd entà establir un espaci comun transfronterièr en usatge deth transpòrt aèri e terraqui d’emergéncies sanitàries, qu’esvitarà per prumèr còp eth cambi de veïculs en punt dera termièra. D’aguesta forma, eth servici d’urgéncies se balharà per miei deth transpòrt a on se produsís er incident (Samu 31 en França, TESVA en Aran) enquia era sua atencion en centre d’a on ei originari eth pacient.
Eth Programa Respir ei adreçat entàs persones mès granes de 65 ans que viuen en familha o ne depenen, e qu’an de demorar soletes per malautia, accident, intervencion quirurquica o ua auta rason qu’impedís qu’era persona suenhadora la pogue atíer. Tanben preten aufrir supòrt as familhes en tot proporcionar-les un temps de descans. Es residents s’acuelheràn ena planta sociosanitària dera naua residéncia. En aguest sens, es òbres de remodelacion deth centre an un termini d’execucion d’onze mesi e compden damb un pressupòst d’1,6 milions d’èuros. Eth centre renauit darà cabuda a 14 crambes, que se poderàn convertir en 16, damb banhs adaptadi e servici d’oxigenacion cadua.