Damb era darrèra modificacion deth pressupòst, er Ajuntament de Vielha e Mijaran, governat per Convergéncia (CDA) e PP, a previst destinar entà 2012 mès de 200.000 èuros en estudis e trabalhs tecnics. Er impòrt dedicat ad aguestes partides supòse un aument d’un 23% en plea epòca de restriccions pressupostàries en totes es administracions publiques.
Era còsso d’Unitat d’Aran en consistòri, Maria Vergés, a cridat era atencion d’aguest aument (de 46.745 èuros), que considère “desproporcionat”, pr’amor que “chòque frontaument damb era timida modificacion qu’a patit era partida d’ajudes sociaus, que sonque aumente 3.000 èuros”.
Entà Vergés, er Ajuntament “aurie de priorizar, en aguesti moments tan terribles de crisi, era atencion e era ajuda entàs famílies que pitjor ac passen”. “Era prioritat an d’èster es persones e non es papèrs”, segontes era còsso.
Mocion contra eth canon der aigua as ens locaus
En darrèr plen, CDA votèc en contra dera mocion presentada peth grop d’UA sus eth crubament deth canon der aigua as ens locaus prebotjat pera Generalitat laguens dera modificacion der article 64 deth tèxte rehonut dera Legislacion en Matèria d’Aigües en Catalunya.
Eth còsso Rufino Martínez (UA) manifestaue que “aguesta modificacion prevé qu’es Ajuntaments, per prumèr viatge en Catalonha, agen de pagar pera aigua qu’aufrissen a trauèrs des hònts publiques e monumentaus, neteja de carrèrs e er adaiguatge de parcs, jardins e parcs esportius”.
Tà Martínez, “es ens locaus patiràn ua naua carga impositiva e s’agreujarà encara mès era sua delicada situacion financèra”, atau madeish tanben higie que “resulte fòrça sorprenent coma, un còp mès, Convergéncia Democratica Aranesa age votat en còntra des interèssi deth municipi”.
Fòto: Wikipedia