Planvolut amic,
Eth darrèr 4 de deseme, en marc dera celebracion de Santa Bàrbara, eth Sr. Carlos Barrera, coma sindic d’Aran, utilitzèc eth sòn discors tà hèr tergiversacions interessades sus eth debat qu´en data 26 d´octobre i auec en Plen deth Conselh sus era possibilitat de mielhorar es defenses contra eth huec enes nuclèus més aluenhadi des parcs de pompièrs.
Per aguesta rason voleria remercar es aspèctes qu´an motivat aguest debat:
1. Eth 17 d´octobre, Unitat d’Aran presentèc ua mocion en Conselh Generau d’Aran, a peticion des vesins de Vilamòs, entà debàter en Plen, qu´adjunhi.
2. En cap de moment en aguest debat, talament e com ac demòstren es actes d’aquest Plen, se met en qüestion era eficàcia des Pompièrs d’Aran, tot ath contrari, aguesta se remèrque.
3. Dempús deth debat se vòte favorablament eth tresau punt dera mocion.
4. Pògui dies dempús, se produsís un incendi en Tredòs, en qué, segontes eth diari Segre deth dia 18 de noveme de 2005, es vesins an dificultats tà accedir as equips de prumèra intervencion. Unitat d’Aran reafirme eth besonh de revisar aguest materiau e d’impartir formacion, talament e com demanaue ena sua mocion.
5. Entenem qu’aguest procès forme part d’un debat politic normau en un país democratic en quau, era oposicion reclame enes institucions aqueres demanes que semblen justes. E son es règles democratiques de majories e minories que decidissen s’aquera iniciativa ei acceptabla o non.
Non voleria despedir-me, sense abantes méter en tòn coneishement, era nòsta preocupacion pera utilizacion dera hèsta des Pompièrs, tà un interès politic partidista, e sectari. En aguest sens, es conselhèrs d’Unitat d’Aran e jo en sòn nòm, lamentam qu’ua institucion com era des Pompièrs d’Aran, as quaus m’aunère especiaument aué apertenhut pendent fòrça ans, sigue utilizada en un dia tant especiau com eth dera sua hèsta tà hèr arengues politiques que tergivèrsen era realitat e que manifèsten unicament un interès partidari.
Arregraïsqui en nòm dera societat aranesa eth vòste esfòrç de servici e era vòsta entrèga, e reitèri era nòsta disposicion a collaborar en toti aqueri ahèrs que considerésquetz de besonh.
Aprofiti tanben era escadença entà desirar-vos un Bon Nadau e un prospèr an 2006.
Paco Boya
Aran, 7 de deseme de 2005.
Pdt/ Te pregaria dongues informacion dera nòsta queisha ara rèsta de membres deth tòn Parc.