Planvoludi/es vesins/es
e amics/gues,
Coma saberàs pes informacions
apareishudes enes mieis de comunicacion, è decidit presentar-me coma
candidat as eleccions deth Conselh Generau d’Aran peth terçon de
Pujòlo. Ues eleccions enes que, des listes d’Unitat d’Aran-PSC
ençà, damb eth nòste candidat a Síndic, Paco Boya, volem daurir
ua naua etapa en govèrn des nòstes institucions.
Sò ramadèr de vocacion
e aguesta activitat me permet compartir damb tu bères ues des preocupacions
qu’a eth nòste sector. E aguesta a estat era rason pera qu’è decidit
de presentar-me a d’aguestes elleccions. Pensi qu’a arribat eth
moment de passar des paraules as hèts e dar un impuls a dus tèmes
tant importants coma son es pagesi e eth miei ambient.
Aguestes seràn es
mies responsabilitats en govèrn s’es ciutadans mos balhen era sua
confiança. Ei coma sabes un sector en que sò absolutament implicat
e creigui que, amassa, en tot compdar damb era inestimabla ajuda de
toti vosati, podem hèr passi importanti entà consolidar eth sector
e facilitar eth trabalh des qu’encara se dediquen a d’aguest noble
trabalh.
Eth nòste país non
se pòt pas perméter era desparicion d’aguest sector tant estacat
ara conservacion deth miei ambient. Per açò era nòsta apòsta ei
fèrma e decidida, e melhoraram era gestion administrativa deth Conselh
Generau, en tot apropar era administracion e en reforçar es ajudes
dera Generalitat de Catalunya e es pròpries.
Non pogui, pera extension
d’aguesta carta, detalhar-te es nòstes prepauses que, per un aute
costat, ja reberàs en tòn domicili pendent aguesti dies, o que pòs
consultar en plana wèb http://www.pacoboya.org
Totun, ja sabes que
demori ara tua disposicion entà comentar o esclarir es dubtes que respècte
a d’aguesti encastres pogues auer sus aguest programa.
Plan coraument,
Francisco Bruna