Planvoluts vesins,
M´adreci a toti vosati, un còp passades es eleccions municipaus, enes quaus, era volentat des poblants de Vielha-Mijaran a encomanat, ara candidatura que jo entestaua, er aunor e era grana responsabilitat de formar eth Govèrn deth nòste municipi.
Voi dider-vos, en prumèr lòc, qu´era nòsta volentat tad aguesti pròplèus quate ans ei de daurir era participacion ena gestion der Ajuntament de Vielha-Mijaran a toti es grops politics e as persones qu´an estat trigades en representacion des diuèrses fòrces politiques presentades en aguest procès electorau. Ei per´mor d´aguesta conviccion qu´en aguesti propèrs quate ans, eth dialòg e era participacion de toti es representants politics, mès tanben des diuèrsi sectors dera nòsta ciutadania e de toti e cada un des nòsti vesins, a d´esdevier ua caracteristica essenciau ena nòsta vida politica.
Es futurs projèctes que Vielha-Mijaran a de besonh tà èster un pòble que garantize eth progrès e eth benestar de toti, an de configurar-se en aguesti mesi e damb eri vam a crear un modèl de ciutat que nosati auem volut qualificar d´”amabla damb es persones”. Mos cau donc, trebalhar en aguest sens tà que totes es persones que viuen en aguest minicipi se sentisquen participants e compromeses damb un projècte collectiu e illusionant que mos hèsque a créisher en àmbit economic, mès tanben enes aspèctes civics e enes sociaus.
Tà hè´© possible, mos cau crear es instruments de participacion en Ajuntament, emmarcar e concretar toti aqueri projèctes de futur e dedicar-mos a trebalhar en còs e anima tà amiar-les entà dauant damb eth maxim de complicitats. Non voi totun, deishar de díder que, com nau alcalde arregraïsqui, a toti aqueri que m´an precedit en cargue, eth sòn trebalh e esfòrç. En aguest sentit les convidi exprèssament a somar esfòrci damb er equip de Govèrn tà hèr de Vielha un pòble mielhor e capaç d´aufrir mès qualitat de vida as sòns vesins.
Joan Riu Llonch.
Alcalde Vielha-Mijaran.