Damb motiu des compareishences sus era Lei de regim especiau
Eth senador aranés e secretari generau d’Unitat d’Aran, Paco Boya, a reclamat aué ath Parlament que tengue en compde era votz pròpria d’Aran coma territòri singular non comarcau, ena tramitacion dera naua Lei d’Aran, que contengue ua reforma electorau e un nau sistèma de finançament mès justi. De hèt, “era Lei d’Aran non pòt èster aprovada peth Parlament sense èster aprovada abantes peth Plen deth Conselh Generau d’Aran”, en representacion de toti es aranesi, segontes a manifestat.
Tà Boya, era norma “a de contier un sistèma de finançament just damb eth territòri, pr’amor que d’ua auta forma serà ua lei mancada d’utilitat”. Ath delà, “er actuau modèl electorau non respon ara realitat aranesa, ja qu’eth numerò de vòts tà escuélher un conselhèr ei diferent segontes eth terçon”. Eth tanben conselhèr generau a exigit que non se cambie eth nòm dera lengua, er aranés, pr’amor que “ua madeisha lengua se pòt conéisher damb diuèrsi nòms”.