Eth nòste projècte ei Aran. Aran ès tu

Boya obten eth supòrt dera Deputacion de Lleida ena reclamacion deth desplegament dera Lei der Aranés e dera inclosion dera lengua enes curriculums d’educacion primària

Eth deputat d’Unitat d’Aran a presentat ua mocion entà qu’era Generalitat desplegue de forma inmediata aguesta Lei e dòte ath Conselh Generau d’Aran des recorsi de besonh. Aguesta madeisha mocion a estat presentada peth PSC, a instàncies d’UA, en Parlament de Catalonha.

En seteme de 2010 eth Parlament de Catalonha aprovaue era Lei der Occitan, aranés en Aran. Ua lei qu’auie de perméter ath Conselh Generau d’Aran era aplicacion d’ua politica lingüistica qu’ajudèsse impulsar er usatge e implementacion dera lengua, que non a deishat de recular enes darrèrs ans. Totun, a despièch d’açò, er unic punt d’aguesta lei qu’a estat desplegat ei era creacion dera Academia dera Lengua, en tot qu’eth Conselh Generau a vist coma era Generalitat retalhaue un 40% eth pressupòst destinat a lengua.

Passadi mès de cinc ans donc d’ençà dera aprovacion dera Lei, Unitat d’Aran a presentat ena Deputacion de Lleida ua mocion tà reclamar e eth desplegament dera Lei atau coma era dotacion de besonh ath Conselh Generau d’Aran. Atau madeish a instat ath PSC a que tanben presentèsse aguesta mocion en Parlament, era quau se debaterà enes pròplèu dies.

En aguest madeish sens, Francés Boya, tanben a reclamat qu’eth Departament d’Ensenhament inclodisque de manèra urgenta er aranés enes sòns curriculums d’educacion primària. Boya afirmaue que “açò ei quauquarren qu’actuament non existís, en tot que, paradoxaument, aguesti curriculums òc qu’inclodíssen era rèsta de lengües presentes en Catalonha actuament. Ei eth departament d’ensenhament qui a era competéncia entà redactar-les e aplicar-les, e eth Conselh Generau d’Aran a de velhar tath sòn compliment

Aguesta mocion a estat aprovada en plen dera Deputacion de Lleida que s’a amiat a tèrme aué diuendres, damb eth vòt favorable de toti es grups excèpte eth deth PP que s’a abstengut.

En aguest madeish plen, e a instàncies d’Unitat d’Aran a trauès deth sòn deputat, Francés Boya, s’a acordat era creacion d’un grup de trabalh tà articular es posibles accions qu’era Deputacion de Lleida pòt desvolopar entà impulsar era melhora des territòris de montanha deth Pirenèu de Lleida. Aguest grop compdarà damb deputats e damb persones des encastres universitaris e scientifics que poguen aportar es sòns coneishements ad aguest grop.