Era Comission de Cultura deth Parlament a aprovat era Prepausa socialista e d’Unitat d’Aran de desplegament dera Lei der occitan, aranés en Aran
Eth Secretari Generau d’Unitat d’Aran, Paco Boya, a celebrat qu’aué era Comission de Cultura deth Parlament age aprovat era Prepausa deth PSC e d’Unitat d’Aran de desplegament dera Lei der occitan, aranés en Aran. Boya a afirmat que “era manca d’implicacion deth govèrn dera Generalitat enes darrèri cinc ans a paralizat era Lei der aranés; ara mos cau recuperar es politiques de preservacion e promocion dera lengua”. Per açò, a metut de relèu que “era Prepausa respon justament a qu’er aranés se tròbe actuaument en ua situacion fòrça critica, sustot dempús qu’eth pressupòst dera Generalitat destinat as politiques de normalizacion lingüistica der aranés age queigut per dejós deth 40%”. Atau donc, a dit, “i a agut un incompliment manifèst per part deth Govèrn dera Lei de 2010 der occitan, aranés en Aran” e a hijut que “deuant era grèu situacion ena que se tròbe er aranés, cau reactivar es politiques de preservacion dera lengua e incentivar es politiques de promocion deth sòn usatge”.
Un còp debatut damb toti es grops parlamentaris, era Comission de Cultura a aprovat era Prepausa entath desplegament dera Lei de 2010 der occitan, aranés en Aran, damb era unanimitat de toti es grops ena majoria des punts, a excepcion des punts 3, 4 e 5, enes quaus eth PP s’a abstengut (adjunhem es punts definitius dera Prepausa).
Eth deputat deth PSC e pòrtavotz ena Comission de Cultura deth Parlament, Rafel Bruguera, a defenut que “eth Govèrn a de desplegar d’un viatge era Lei der occitan, aranés en Aran e revertir es retalhades dera Generalitat enes politiques de normalizacion lingüistica”. Bruguera a rebrembat que “era lei aprovada en 2010, damb eth govèrn d’Entesa; ua lei de desvolopament der Estatut damb ample consens politic e sociau en Parlament e en Aran, pòrte mès de cinc ans arturada” e a ahijut que “er unic punt desvolopat a estat era creacion dera Academia aranesa deraLengua Occitana, mès sense consens ne sociau, ne politic ne academic/scientific en Aran”
Ath delà, eth deputat socialista a criticat que “tanpòc i a agut auanci ena preséncia dera lengua enes mieis de comunicacion publica e privada coma tanpòc s’an incentivat, ath contrari, an practicament desapareishut es publicacions e incentius tara creacion literària er aranés”. “Eth Departament d’Ensenhament dera Generalitat seguís desbrembant en decrèt d’organizacion des ensenhaments d’educacion primària e tanben s’a eliminat er aranés coma mèrit ena darrèra convocatòria de places entà Mòssos d’Esquadra”, a dit. Per tot açò, Rafel Bruguera a afirmat que “i a sufisents motius, sustot pera reculada que patís er aranés, entà desvolopar era Lei der occitan, aranés en Arandamb es esturments adequadi e revertir es retalhades des darrèri cinc ans en tot recuperar, aumens, es partides de 2010, atau coma er includiment der aranés enes curriculums d’educacion primària coma tresau lengua oficiau”.
Barcelona, 27 d’abriu de 2016