Eth nòste projècte ei Aran. Aran ès tu

Boya: “Era admetuda a tramit deth recors contra era lei der aranés ei conseqüéncia dera senténcia deth TC ahiscada peth PP”

Unitat d’Aran a reafirmat eth sòn posicionament contra eth recors presentat peth Govèrn centrau ara lei der aranés e, en paraules deth sòn secretari generau e exsíndic Francés Boya, “era admetuda a tramit deth recors per part deth Tribunau Constitucionau ei conseqüéncia dirècta dera senténcia sus er Estatut motivada peth PP”. Era senténcia ja metie en qüestion qu’ua lengua, en aqueth cas eth catalan, siguesse declarada de “usatge preferent” en ua Comunautat Autonòma.

Francés Boya a refermat “eth compromís d’UA entà qu’er aranés sigue era lengua troncau e veïculara dera Administracion publica e era escòla e guanhe preséncia enes mieis de comunicacion en Aran, atau com dejà passe damb eth catalan en ensem de Catalonha”. “Sonque volem garantir era normalitat que li pertòque ar aranés coma lengua pròpria e cooficiau d’Aran e tanben de Catalonha”, segontes eth pòrtavotz d’UA.

Per aquerò, “demanaram ara Generalitat e ath Conselh que placen es recorsi de besonh entà assegurar aguesta normalitat, e tanben demanaram ath Govèrn der Estat e ath PSOE era sua implicacion ena promocion der aranés e eth respècte ara diversitat lingüistica d’Aran e er Estat, perque er aranés ei un patrimòni de toti es sòns ciutadans”, segontes Boya.