Eth conselhèr portaveu d’Unitat d’Aran, Francés Boya, a assegurat aué que “eth sindic Barrera non a sabut deféner es interèssi dera Val d’Aran ena negociacion deth finançament”, pr’amor que, damb era retalhada que patirà eth Conselh, “se redusirà era capacitat d’autogovèrn e eth marge entà amiar entà dauant politiques pròpries”. Boya a efectuat aguestes declaracions en programa Meddia Aranés, de Catalonha Informacion.
Ath delà, a reiterat era demana d’UA entà qu’eth govèrn de CDA “impulse un programa tà crear ocupacion en Aran”, ja qu’enquia ara non a estat capable d’activar-le, en tot incomplir ua des principaus promeses electoraus deth sindic Barrera.
Boya s’a mostrat susprés per qu’ua institucion privada elabòre un estudi economic tara naua Lei d’Aran, “quan calerie profitar es servicis deth Conselh o dera madeisha Generalitat”. Tanpòc a vist credible er anonci deth govèrn aranés entà recuperar era residéncia de Les, perque “enquia ara s’a implicat pòc en evitar eth sòn barrament e, de moment, sonque aufrís incerteses e pògues concrecions”.