Mès de 20.000 persones se citèren dissabte en Besièrs entà reclamar ar Estat francés era preséncia dera lengua occitana en ensenhament, enes mejans de comunicacion e ena vida e via publica. Eth candidat tà Síndic e secretari generau d’Unitat d’Aran, Paco Boya, assistic ara manifestacion convocada per Institut d’Estudis Occitans, FELCO, Calandretas, Òc-Bi, Platafòrma de la Joventut d’Òc e Felibrige e que marchèc jos eth lèma “Anem òc, per la lenga occitana!”.
Era manifestacion siguec tot un èxit e un pas fòrça important entath movement occitanista. Alcaldes coma eth de Tolosa, eth d’Ortez, eth de Besièrs, vicepresidents des regions occitanes, eth vicepresident deth grop socialista en Senat e alcalde de l’Avelanet, entre d’auti, tanben se manifestèren.
Paco Boya declarèc que “quauquarren se botge en reconeishement dera nòsta lengua, damb toti es accents dera tèrra, en tot marchar sus es carrèrs dera vila catara damb musica e esperança en futur”. Totun eth lidèr d’UA auec de lamentar que “cap des que s’aumplissen era boca d’occitanisme en Govèrn d’Aran non an vengut tà manifestar-se a favor dera lengua en un dia istoric entath movement occitan”.