Coma cap dera oposicion deth partit Unitat d’Aran, voi compartir damb es vesins de Naut Aran eth balanç des mesures qu’auem prepausat e artenhut pendent eth periòde 2023-2024. Des dera nòsta posicion, auem trabalhat damb fermetat e dedicacion entà èster ua oposicion utila, enfocada en aportar solucions concrètes e beneficis reaus ath nòste municipi.
Pressupòsti 2025: Abstencion damb Responsabilitat
En recent procès d’aprobacion des pressupòsti de Naut Aran entà 2025, adoptam ua postura d’abstencion. Non participam ena sua elaboracion, mès açò non mos a empedit contribuïr actiuaments en tot prepausar mesures qu’an dejà estat acceptades e auràn un impacte positiu entàs nòsti vesins.
Dubertura deth Camp de Fotbòl.
UA des nòstes prumères prepauses siguec era dubertura deth camp de fotbòl ara ciutadania. Açò permet qu’equips e clubs locaus poguen accedir as installacions esportiues de qualitat, en tot promòir era practica der espòrt entre es joeni e en tot favorir era coesion sociau. Mos anime qu’aguesta prepausa age estat adoptada, pr’amor que impacte dirèctaments ena qualitat de vida des nòsti vesins.
Revision dera bonificacion peth increment der IBI: Ua ajuda entàs Familhes
Era augment deth 25% en Impòst sus es Bens Immòbles (IBI) ère ua mesura que preocupaue a fòrça vesins. Iniciauments, eth govèrn municipau sonque contemplaue era compensacion entàs abitatges abituaus, en un municipi a on mès deth 80% des vieundes de Naut Aran non son d’utís abituau. Des d’Unitat d’Aran, artenhem qu’aguesta compensacion, non sonque siguésse estara vieunda principau, se non que tanben s’estenésse a totes es finques urbanes sense rendiment economic, coma bòrdes, uarts, corraus o pardies de qualificacion urbana sense activitat economica des vesins de Naut Aran. Açò represente ua aleugeriment conomic significatiu entà fòrça familhes qu’aurien demorat afectades per aguest augment.
Supòrt ath Sector ramadèr : Increment d’Ajudes as assegurances des explotacions ramadères.
Eth sector ramadèr, pilar fonamentau deth suenh deth nòste entorn, afronte rèptes derivadi dera augment des còsti de produccion. Per açò, en plen ordinari de març de 2024, prepausèrem incrementar es ajudes destinades a sufragar es assegurances des explotacions ramadères. Mos complatz informar que, gràcies ara nòsta demana, eth govèrn municipau confirmèc qu’aguestes ajudes aumentaràn en 2025. Ath delà, suggerim que s’ajusten en foncion der IPC acumulat des darrèri ans entà garantir era sua eficacitat deuant dera pujada de còsti.
En Arties e Garòs, coma grup dera oposicion, presentam iniciatives entà dignificar enclaus istorics e recuperar espacis antics coma es hònts de Sapujo o deth parc deth carrèr Sant Pelegrin, o coma en Garòs, a on eth Conselh Generau d’Aran a recuperat e restaurat es antigues pentures dera Glèisa de Sant Julian de Garòs.
Compromís damb un Futur Melhor.
Des dera equip d’ Unitat d’Aran en Naut Aran, contunham trabalhant damb un fèrm compromís entà ua oposicion constructiva que beneficie as vesins de Naut Aran. Era nòsta intencion non ei simplaments soslinhar problèmes, se non que tanben, dar solucions qu’arresponen as besonhs reaus des nòsti vesins.
Contunharam promoiguent mesures que fomenten eth desvolopament economic, sociau e ambientau de Naut Aran, en tot assegurar que toti es vesins se beneficien d’ua gestion responsabla e enfocada en benèster comun.
Marc Tarrau Leja, Cap dera Oposicion e pòrtavotz d’Unitat d’Aran en Naut Aran