Er alcalde de Vielha, Joan Riu, e eth secretari generau d’Unitat d’Aran e deputat en Parlament, Paco Boya, an reconeishut er esfòrç deth Ministèri de Foment ena agilizacion des òbres deth nau tunèu, qu’acabaràn pendent aguest an 2007. Totun an exigit damb contundéncia ath secretari d’Estat d’Infraestructures, Víctor Morlán, era definicion e bastissa deth nau traçat dera carretèra N-230 ath sòn pas per Aran, tot e reconéisher qu’era decision deth Ministèri de non convertir era N-230 en ua autovia, coma auie previst eth govèrn deth PP, “ei ua garantia entà conservar es valors paisatgistics e ambientaus d’Aran”.
Paco Boya a lamentat qu’eth Síndic age profitat er esbauçament de part deth vielh tunèu entà criticar a Foment “damb un exercici d’electoralisme pòc apropriat damb era gravetat dera situacion” e a rebrembat que “Barrera questionèc eth bastiment d’un nau tunèu de Vielha”. “Sonque cau repassar era emerotèca”, a sentenciat.
“Eth besonh d’acabar eth nau tunèu e melhorar era N-230 des deth tunèu enquiara termièra francesa a estat tostemp ua prioritat entà Unitat d’Aran des deth punt de vista dera politica d’infraestructures que volem entath país a diferéncia dera actitud dubitativa de Barrera”, a declarat Boya.
Paco Boya a explicat que “Vielha e eth conjunt dera Val d’Aran an de trebalhar damb leiautat institucionau damb es govèrns catalan e der Estat entà recuperar era normalitat viària auançant enes projèctes de futur de melhora des infraestructures e ajudant as sectors afectadi per aguesta situacion, surtot eth torisme e eth comèrç”.