Eth sindic d’Aran, Francés Boya, s’a mostrat fòrça satisfèt per acòrd ath quau an arribat es grops que dan supòrt ath Govèrn dera Generalitat (PSC, ERC e ICV) entà excludir Aran dera organizacion des vegueries. Boya a assegurat que “eth Govèrn de Catalonha a respectat, ara fin, era singularitat dera Val d’Aran en excludir-la des vegueries, en tot hèr realitat eth compromís qu’expressèc en aguest sens eth president Montilla, eth passat 19 de març, ena sua visita entà Aran”.
Entath sindic, “es grops d’Entesa an escotat es aspiracions deth pòble aranés e s’an avengut a refortilhar er estatus dera Val coma entitat territoriau singular laguens de Catalonha, d’acòrd damb eth mandat estatutari”.
Francés Boya a declarat que “aguest reconeishement per part des institucions catalanes aquerís ua dimension istorica e apregondís era vinculacion institucionau, politica e de bon vesinatge dera Val d’Aran damb es pòbles deth Pirenèu e eth conjunt deth Principat de Catalonha”. Eth sindic a explicat qu’er adòrd des grops d’Entesa establís que “eth Conselh Generau serà er unic referent territoriau, perque demore garantida era sua relacion bilaterau damb era Generalitat e se daurís era pòrta ara delegacion des foncions deth Conselh de Vegueria ath pròpri Conselh Generau, quan er ordenament juridic estatau ac permete”.
Eth PSC, ERC e ICV an pactat ua propòsta d’esmendes pera quau era vegueria der “Alt Pirineu i Aran” se transforme en “Alt Pirineu” e ei formada pes “municipis corresponents as comarques d’Alta Ribagorça, Alt Urgell, Cerdanya, Pallars Jussà e Pallars Sobirà”. Segontes er acòrd prenut ena ponéncia dera lei de vegueries, s’incorpòren dues disposicions (ua transitòria e ua addicionau) que preven qu’eth Conselh assomisque es competéncies previstes entara vegueria.
(Comunicat deth Conselh Generau d’Aran)