Planvolut amic,
Coma dejà saberàs pes informacions apareishudes pendent aguesti dies, sò candidat ath Conselh Generau d’Aran. Ua decision fòrça meditada que, pera responsabilitat e respècte ath Grèmi, m’a amiat a renonciar ath cargue de president, responsabilitat que desvolopava en Grèmi d’Otalaria.
Eth motiu peth que me presenti a d’aguestes eleccions, coma independent ena candidatura d’Unitat d’Aran qu’encapçale Paco Boya, ei era conviccion qu’Aran a de besonh un cambi de govèrn.
Un cambi qu’a de plantejar-se en toti es sentits, mès especiaument en encastre deth torisme e deth comèrç. Pensi sincèrament qu’es empresaris auem d’implicar-mos en aguest cambi, e consolidar naues prepauses entà afrontar era dura competéncia e rapida evolucion que patís aguest sector tant important entara nòsta economia.
En aguesti mesi prèvis ara campanha auem concretat bères accions que pòden èster importants entath futur, voi senhalar-te’n ua d’eres que poirie èster determinant e que supausarie era inclosion d’Aran en un projècte pilòt dera Secretaria d’Estat e era Direccion Generau de Torisme (Tourespaña). Un projècte que mos a de perméter internacionalizar eth nòste destin toristic e comerciau, en tot convertir Aran en un producte de prumèr orde en torisme de montanha europèu. Serie ua magnifica oportunitat entà desestacionalizar e melhorar era qualitat des nòsti productes.
Non ei possible, pes caracteristiques d’aguesta carta, explicar-te eth nòste programa, que pòs consultar ena plana web http://www.pacoboya.org mès demori ara tua disposicion entà comentar toti es dubtes o questions que pogues plantejar ath respècte.
T’arregraïsqui era atencion que me balhes ena lectura d’aguesta carta e voi, ena mesura qu’eth tòn temps te permete, compdar damb tu entà començar ua naua etapa e arténher naui objectius en encastre toristic, un escastre tant important e que mos afècte de forma dirècta.
En tot demorar meritar era tua confiança enes candidatures d’Unitat d’Aran-PSC, rep tota era mia consideracion.
Juan Antonio Serrano